Ministri Vehapi inauguroi projektin ““Promovimi i hortikulturës në Kosovë “

Qeveria e Zvicrës dhe ajo e Danimarkës gjatë periudhës katërvjeçare do të investojnë bashkërisht në projektet e hortikulturës në Kosovë.

Ministri i Bujqësisë, Pylltarisë dhe Zhvillimit Rural, Idriz Vehapi, tha se projekti për hortikulturën do të ndihmojë prodhimin e produkteve të hortikulturës dhe ndër të tjera shtoi:

“Synimi jonë në radhë të parë është ngritja e prodhimtarisë, kreditë për fermerët, konkurrenca e ndershme në mes prodhuesve dhe importit, promovimi i prodhimeve vendore etj.”, tha Vehapi.

Ai shtoi se këto do të arrihen edhe me kontributin e donatorëve, organizatat qeveritare dhe jo qeveritare nga vendet mike të Kosovës, ndërsa bashkëpunimi i MBPZHR-së do të jetë transparent për të gjitha projektet.

Ministri Vehapi tha se mundësitë financiare të Qeverisë kanë qenë të limituara për ta ndihmuar bujqësinë, edhe pse ka pasur aktivitete që kanë ndihmuar bujqësinë, si heqja e TVSH-së për produktet bujqësore.

Ndërkaq, përfaqësuesi i Zyrës zvicerane, Senior Vendt, tha se Zvicra që nga viti 2001 e ka mbështetur sektorin e hortikulturës në Kosovë, nëpërmjet projektit zviceran për promovimin e hortikulturës.

Përfaqësuesi nga Danimarka, Jorgen Andersen, tha se ky vend i është bashkëngjitur projektit në vitin 2007.

“Kemi një partneritet të përbashkët Zvicër-Danimarkë-Kosovë. Sot kemi të bëjmë me fillimin e një epoke të re. Dje, qeveria ime e ka njohur Kosovën shtet të pavarur. Ne do të jemi të përkushtuar për Kosovën edhe në të ardhmen”, tha Andersen.

Zvicra që nga viti 2002 ka investuar më shumë se 8 milionë franga në sektorin e hortikulturës në Kosovë. /A.Pllana/