Në Prishtinë

U hap  Panairi Ndërkombëtar i Agrobiznesit të Produkteve Ushqimore

Në hapje të  këtij Panairi mori pjesë edhe z. Hashim Thaçi, Kryeministër i Republikës së Kosovës

Sot, në prani të shumë agrobiznismenëve dhe qytertarëve të  Republikës  së Kosovës është hapur  edicioni i shtatë me radhë i  Panairit ndërkombëtar që po mbahet në Prishtinë ( në Zonën Industriale),  i organizuar nga Aleanca Kosovare e Agrobiznesit (AKA) në bashkëpunim me Ministrinë e Bujqësisë, Pylltarisë dhe Zhvillimit Rural dhe në mbështetje të USAID-it.

Kryeministri i Kosovës me këtë rast i ka përgëzuar prodhuesit dhe përpunuesit e ushqimeve dhe të pijeve, duke i inkurajuar ata se bujqësia në Qeverinë e Republikës së Kosovës do të ketë prioritetet e veta që do të reflektojnë rezultate në të gjithë sektorët e saj.

Duke marrë pfjalën në këtë Panair, Ministri i Ministrisë së Bujqësisë, Pylltarisë dhe Zhvillimit Rural Prof. Dr. Idriz Vehapi ndër të tjera  tha: “Po bëjmë sot promovimin e produkteve ushqimore dhe të pijeve nga vendi dhe  rajoni të bindur se sigurimi i ushqimit për Kosovën dhe rajonin është një sfidë e madhe që në vete ngërthen ndjenjën e sigurisë për shëndetin e mbarënjerëzimit, duke mos njohur kufi, racë as gjuhë. Në  edicionin e shtatë me radhë të këtij  Panairi, ka shtuar tutje Vehapi,  kanë ekspozuar prodhimet e tyre ushqimore bujqësore shumë kompani nga vendi dhe rajoni dhe sivjëet vetëm nga  Egjipti në Panair po marrin pjesë 10 kompani. Kjo  tregon për një aktivitet të ngjeshur që është duke u bërë në rritjen e veprimeve përmbajtësore në përmbushjen e objektivave zhvillimore në sektorë të ndryshëm të bujqësisë.

Ministri Vehapi tutje ka  bërë me dije se   Qeveria e Kosovës  po i inkurajon prodhuesit dhe përpunuesit e prodhimeve bujqësore që në bashkëpunim të ngushtë me Ministrinë e Bujqësisë, Pylltarisë dhe Zhvillimit Rural të ndiqen maksimalisht rrugët agronomike për prodhim stabil dhe të qëndrueshëm të prodhimtarisë bujqësore, duke nënvizuar  se   Kosova e ka  edhe të veçantën e vet në disa lloje prodhimesh specifike, që dallohen me cilësi e kualitet të  lartë nga prodhimet e ngjashme të vendeve të rajonit. Tashmë dihet se sa janë të kërkuara në tregun perendimor verërat e Kosovës, djathi i Sharrit, mishi i qengjave dhe kecave që kultivohen në vendet e thella rurale, në ambiente plotësisht ekologjike.

Uroj me këtë rast që gjatë vizitës që do t’u bëni shtandeve ekspozuese  gjatë  këtyre ditëve, të bindeni për vlerat dhe cilësinë e prodhimeve ushqimore dhe të pijeve që prodhohen në Kosovë dhe më gjerë, ka përfunduar fjalën e vet z. Idriz Vehapi, Ministër në MBPZHR.