Në Zabel të Epërm të Drenasit është lëshuar në punë pjesa e dytë e sistemit të ujitjes

Ministri Idriz Vehapi ka bërë përurimin e këtij sistemi

Ministri i Ministrisë së Bujqësisë, Pylltarisë dhe Zhvillimit Rural Prof. Dr. Idriz Vehapi, në praninë e qytetarëve dhe fermerëve të komunës së Drenasit, ku ishte i pranishëm edhe Kryetari i KK z. Nexhat Demaku dhe Drejtori i Përgjithshëm i Sistemi “Ibër Lepenc” Abdullah Nishori, ka bërë përurimin solemn i hallkës së dytë zinxhirore të sistemit të ujitjes në këtë komunë, ku parashihet të ujiten mbi 1500 ha tokë të punuar bujqësore .

Me këtë rast, ministri Vehapi ka bërë të ditur se ky projekt ka kushtuar rreth 250 mijë euro. Këtu ka munguar sistemi i ujitjes për më shumë se 20 vite dhe tani janë rehabilituar një pjesë e madhe e gypave për ujitje të tokës bujqësore.

Aziz Hyseni, fermer nga Zabeli u Ulët tek po i ujiste 50 ari të mbjellë me lakëra, tha se aftësimi dhe rehabilitimi i sistemit të ujitjes sjell me vete shumë të mira, ngase si po shihni edhe ju, unë në këtë arë jam duke i marrë dy prodhime. Së pari e kam korrë tërëshërën që e përdor për ushqim të kafshëve, e tani e kam mbjellur tërë sipërfaqen me lakëra. Bujku, sado që nuk e ka të lehtë punën, prapë mund të ketë profitë nga punimi i tokës, sidomos tash kur tokat tona të plleshme janë futur nën sistemin e ujitjes.

Po përkujtojmë se kohë më parë është nënshkruar Memorandimi trepalësh i Mirëkuptimit ndërmjet MBPZHR, NSH Hidroekonomia “Ibër-Lepenc dhe Kuvendit Komunal të Drenasit me c’rast janë investuar 300 mijë euro .

Me qëllim të zhvillimit të bujqësisë, Qeveria e Kosovës respektivisht Ministria e Bujqësisë, Pylltarisë dhe Zhvillimit Rural do të investojë në objektet e ujitjes në disa komuna të Kosovës. Shi për këtë MBPZHR ka përzgjedhur ndër të tjera edhe Komunën e Drenasit, ku ekziston infrastruktura e ujitjes e cila duhet rehabilituar me qëllim të ofrimit të shërbimeve të ujitjes bujqve nga NH “ Ibër Lepenci.”

Bazuar në iniciativat e mëhershme për rehabilitimin e sistemeve të ujitjes në disa rajone të Kosovës për zhvillimin e bujqësisë, Qeveria e Kosovës, respektivisht Ministria e Bujqësisë, Kuvendi Komunal në Drenas dhe NH “ Ibër Lepenci”, nënshkruan një Memorandum Mirëkuptimi.