MBPZHR nënshkruan Memorandum Bashkëpunimi me KSLK

Ministria e Bujqësisë, Pylltarisë dhe Zhvillimit Rural (MBPZHR) ka nënshkruar sot Memorandum Bashkëpunimi me Konfederatën e Sindikatave të Lira të Kosovës ( KSLK) rreth çështjeve që kanë peshë kruciale në zhvillimin dhe përparimin e bujqësisë kosovare në të gjithë sektorët e saj. Në emër të Ministrisë së Bujqësisë Memorandumin e ka nënshkruar Prof.Dr. Idriz Vehapi, ministër, kurse në emër të Konfederatës së Sindikatave të Lira të Kosovës këtë dokument me rëndësi të veçantë e nënshkruan: Bahri Shabani e Tahir Tahiri.

MBPZHR zotohet se do të negociojë me Sindikatën e Bujqve të Kosovës (SBK), për të gjitha çështjet që kanë të bëjnë me të ardhmen e bujqësisë dhe zhvillimit rural në përgjithësi, që ndërlidhen me interesat e përbashkëta në fushat përkatëse.

Palët pajtohen me nevojën e subvencionimeve në bujqësi dhe po ashtu është përshëndetur nisma e MBPZHR për subvencionimin e autokombajnerëve , të cilëve, për fushatën e korrje shirjeve u janë siguruar derivate të naftës me çmime prej 30 për qind më lirë, seç është çmimi kushtues në treg.

Mbi bazën e këtij Memorandumi mbetet obligim i palëve që për të gjitha çështjet me interes për sektorët e bujqësisë të diskutohet me qëllim të gjetjes së zgjidhjeve të pranueshme për palët.