Datë: 02/04/08

Prof.Dr. Idriz Vehapi me bashkëpunëtorët vizitoi Rahovecin

Ministri i Ministrisë së Bujqësië, Pylltarisë dhe Zhvillimit Rural , Prof.Dr. Idriz Vehapi me bashkëpunëtorët ka vizituar sot (02/04/08) komunën e Rahovecit.

Fillimisht ministri Vehapi është takuar me udhëheqjen komunale, ku morën pjesë edhe agrobiznismenë dhe fermerë të shquar të kësaj komune, me ç’rast është diskutuar për të gjitha problemet dhe vështirësitë me të cilat ballafaqohet bujqësia kosovare sot.

Qazim Qeska, kryetar i KK të Rahovecit e ka njoftuar stafin më të lartë të MBPZHR për potencialet që ka kjo komunë në zhvillimin e bujqësisë, sidomos të vreshtarisë dhe të perimkulturës.

Duke i kuptuar në thellësi brengat e fermerëve të kësaj komune, por edhe më gjerë, për vështirësitë që po shfaqen në disa lëmi të caktuara, sidomos në mungesë të subvencioneve dhe të çmimeve të larta që janë në sigurimin e inputeve bujqësore, ministri Vehapi i ka siguruarfermerët se Qeveria e Kosoves dhe MBPZHR do të angazhohen maksimalisht që të përmbushin kërkesat e tyre, gjithçka që është në mundësinë e qeverisë dhe organeve më të larta ekzekutive të vendit.

Ju e dini, tha tutje Vehapi, separa ardhjes në pushtet të qeverisë së re, më heret ka qenë i aprovuar buxheti për MBPZHR dhe ka qenë e pamundur të ndërhyhet në këtë moment. Mirëpo, me Konferencën e Donatorëve që pritet të mbahet në muajin qershor të këtij viti, kemi besim të plotë se do të jemi përfitues të projekteve që do të aplikohen në këtë konferencë. Nga ana tjetër duhet të jeni të sigurtë se qeveria e Kosovës e ka futur bujqësinë në shkallë të prioritetve dhe me siguri do të kemi një rritje të ndieshme në fushën e bujqëisë, ka thënë ndër të tjera Ministri Idriz Vehapi.

Ai në vazhdim ka folur edhe për mundësinë e hapjes së vendeve të reja të punës në sektorë të ndryshëm të bujqësisë si dhe e ka çmuar lartë punën dhe përkushtimin e fermerëve rahovecian në rritjen e sipërfaqeve të vreshtave dhe në kultivimin e verieteteve të reja që janë më profitabile për këtë rajon. Gjatë takimit me fermerë ka pasur edhe shumë pyetje me interes në të cilat janë përgjegjur autoritetet e MBPZHR dhe ato lokale.

Gjatë kësaj vizite Ministri Vehapi ka vizituar edhe disa kompani të suksesshme të përpunimit të verës, si bodrumin “Haxhijaha”. “Eko” etj.

Zyra për Komunikim me Publikun