Shefi i Zyrës Kroate vizitoi Ministrinë e Bujqësisë

Ministri i Ministrisë së Bujqësisë, Pylltarisë dhe Zhvillimit Rural z. Idriz Vehapi me bashkëpunëtorët kanë pritur sot për vizitë (22 prill) një delegacion të Zyrës Kroate në Prishtinë, të prirë nga z. Davor Vidis, shef i Zyrës.

Në takim u tha se Qeveria kroate është e interesuar që përmes formave të bashkëpunimit ( me nënshkrimin e Memorandumeve për Mirëkuptim) të thellohen marrëdhëniet ndërshtetërore në mes të Kroacisë dhe Republikës së Kosovës, sidomos në sektorë të ndryshëm të bujqësisë. Me theks të veçantë është përmendur bashkëpunimi në sferën e sigurisë së ushqimeve konform standardeve evropiane, të blegtorisë, perimkulturës etj.

Z. Vidis, po ashtu, ka shprehur gatishmërinë e tij që edhe gjatë periudhës vijuese të vazhdohet me këmbim përvojash të ndërsjella dhe me këtë rast ai ia dorëzoi ftesën ministrit Vehapi për pjesëmarrje e tij në Panairin Ndërkombëtar të Bujqësisë që mbahet në shtator të këtij viti në Bjellovar .

Ministri Vehapi pasi ka falenderuar përfaqësuesit e Zyrës Kroate për vizitën e bërë, ai ka mirëpritur këtë bashkëpunim të sinqertë ndërmjet Kosovës dhe Kroacisë dhe dy dyja palët janë zotuar se do të thellohet bashkëpunimi akoma më shumë në të gjitha sferat dhe sektorët e bujqësisë dhe pylltarisë.