Ministri Idriz Vehapi ka bërë përurimin e sistemit të ujitjes në Drenas

Ministri i Ministrisë së Bujqësisë, Pylltarisë dhe Zhvillimit Rural Prof. Dr. Idriz Vehapi, Drejtori i Përgjithshëm i Sistemi “Ibër Lepenc” Abdullah Nishori dhe kryetari i KK të Drenasit z. Nexhat Demaku, pas nënshkrimit të memorandumit që është bërë kohë më parë, në fundjavën e qershorit, në Drenas kanë bërë përurimin e sistemit të ujitjes për tokat bujqësore të kësaj komune.

Në këtë sistem janë përfshirë mbi 1500 ha tokë të punuar bujqësore, dhe brenda pak ditësh do të përfshihen edhe 500 ha të tjera nga i njejti projekt.

Me këtë rast, ministri Vehapi ka bërë të ditur se ky projekt ka kushtuar rreth 250 mijë euro.”Këtu ka munguar sistemi i ujitjes për më shumë se 20 vite dhe tani janë rehabilituar një pjesë e madhe e gypave për ujitje të tokës bujqësore, ndërsa javën tjetër nën sistemin e ujitjes do te futen edhe 50 ha të tjerë.

Drejtori i “Ibër Lepencit” Avdullah Nishori me këtë rast ka thënë se këtë vit bujqit e kësaj ane, përveç se do ta kenë të rehabilituar sistemin e ujitjes, ata do ta kenë edhe një ndihmesë rreth pagesës vjetore të ujitjes “Si rezultat i kësaj, bujku subvencionohet nga kjo marrëveshje e përbashkët dhe shfrytzuesit e këtij sistemi do të paguajnë vetëm 30% të shumës së paraparë. Në vend të 100 eurove, sa kushton çmimi real i ujitjes, ata do të paguajnë vetëm 30 euro, ka thënë ndër të tjera Nishori.

Nexhat Demaku, kryetari i KK të Drenasit ka falenderuar Ministrinë e Bujqësisë dhe sistemin “Ibër –Lepenci”t për këtë ndihmë dhënë bujqve të kësaj ane.

“Ky është një projekt shumë i rëndësishëm për zhvillimin e bujqësisë në këtë komunë, kur dihet se pjesa më e madhe e sipërfaqes është rurale, tokë e punuar bujqësore”, ka thënë kryetari Demaku, duke u bërë thirrje bujqve që ta shfrytëzojnë këtë sistem të ujitjes për të rritur rendimentet e kulturave bujqësore.